الفرق بين الرجل والمرأة فى الاهتمام بالتفاصيل ونصائح للطرفين
1 - الرجل مش بيهتم بالتفاصيل واهتمامه بيكون بالصورة العامة
هتفهمى دة كويس لو دخلتى اوضة او مكتب ولد هتلاقى كل حاجة مش في مكانها هتلاقى الهدوم على الكرسى وكوباية الشاى تحت السرير وممكن جدا يستعمل الملاية مفرش عادى جدا.
ولو فى مكتب هتلاقى ورق محطوط في كل حتة واقلام مرمية .. الخ .
بس هو كل اللى ف باله انه لما بيبص على الاوضة او المكتب كا كل بيلاقيها زى الفل وجميلة علشان كدة انتى مش هينفع تفرضى عليه انه يهتم بالتفاصيل زيك متحاوليش تفكرية بلون السيراميك بتاع صحبتك اللى لسة متجوزة لانة مش هيفتكر .
الراجل طول ما التفاصيل الصغيرة مش بتتعلق بيه شخصيا ولا بشغله فهو مش هيهتم يشوفها اصلا .علشان كدة انصحك متزعليش لما مايخدش بالة من البيرفيوم الجديد او تسريحة شعرك دة مش معناة انة مش بيحبك لا بالعكس هو بس هيشوفك مختلفة بس مش هيعرف فين الاختلاف بالظبط .
2- الست " المرأة " بتهتم بالتفاصيل جدا قبل اى حاجة حتى قبل تكوين شخصية اللى قدامها
الست بتهتم جدا بالتفاصيل علشان كدة بتهتم بالاكسسوارات جدا وعلشان كدة الراجل بيشوفها انها بتهتم بحاجات تافهة . علشان كدة الست بتتميز عن الراجل بانها بتقدر تركز فى كذا حاجة فى نفس الوقت يعنى ممكن تكون بتتكلم ف التليفون وبتعمل اكل وبتسمع المسلسل اللى شغال برة فى الصالة وبتشوفك انت قاعد بتعمل ايه لوحدك كل ده في نفس الوقت وعلى فكرة بتكون مركزة جدا فى كل حاجة من دول .
النصيحة للطرفين اننا لازم نقدر اختلافنا :
لازم البنت تعرف ان الراجل مش هيركز اذا كانت لفت الهدية بتاعة الفالنتين اللى فات ازاى وانها لازم تغيرها السنادى .
والراجل كمان لازم يعرف ان البنت بتحب التفاصيل اوووى ، شجعها وقولها انتى احلى علشان كذا مش تقولها انتى حلوة وخلاص ماهى عارفة كدة بس هى محتاجة تسمع ايه اللى حبيتة فى التغيير اللى عملتة لانها بتكون عملته علشانك ، ياريت نقدر بعض.
الكاتب : ماجي عزت
المقال يعبر عن رأي الكاتب ولايعبر بالضرورة عن رأي الموقع
