نصائح هامة لنجاح فترة الخطوبة وتجنب المشاكل
ناس كتير بتتوقع ان الخطوبة احلى فترة واجمل فترة بتتعاش ومفيهاش مشاكل او تعقيدات والدنيا بتكون جميلة وانها بتكون مليانة فسح وخروجات وحب وهدايا وبس .
الحقيقة غير كدة !
فترة الخطوبة بتكون مليانة بالمشاكل علشان كدة في الموضوع ده هنعرض اهم النصائح لنجاح فترة الخطوبة وتجنب المشاكل .
النصيحة رقم 1 : الخطوبة فترة تعارف علشان الاتنين المخطوبين يعرفوا بعض اكتر فا محدش يخفي طبعه الحقيقي لانك لو اخفيت طبعك هتقابل مشاكل كتير بعد الزواج .
النصيحة رقم 2 : لنجاح فترة الخطوبة اتفق مع خطيبتك او اتفقي مع خطيبك ان حياتكم خط احمر ومينفعش حد يتدخل فيها والاسرار اللي بينكم متطلعش لحد .
الا في حالة واحدة لو مشكلة ممكن هتأثر على مستقبل الخطوبة والزواج في الحالة دي لازم الاهل يعرفوا المشكلة دي .
النصيحة رقم 3 : اتفقوا على الصراحة .. الصراحة اهم شئ في الخطوبة
النصيحة رقم 4 : بلاش كدب حتى لو في موضوع بسيط لان ممكن كدبة صغيرة تسبب شرخ كبير في العلاقة ولو حصل الشرخ ده هيكون مفيش ثقة وبالتالي المشاكل هتكتر وموضوع فترة الخطوبة مش هيتم . ولو تم هتعيشوا بعد الجواز في دايرة الشك .
النصيحة رقم 5 : كلنا بنغلط بس المشكلة مش في الغلطة اللي بنعملها المشكلة في تكرار نفس الغلطة .. حاول متكررش غلطة انت عملتها وخصوصا لو الطرف التاني سامحك عليها لان تكررها هيعمل مشكلة كبيرة وانك انسان غير مهتم بخطيبتك او خطيبك واحتمال كبير تكرار الخطأ يكون سبب كافي لانهاء فترة الخطوبة .
النصيحة رقم 6 : بلاش توعد ومتنفذش وعدك .. في ناس كتير في فترة الخطوبة بتوعد انها هتعمل كذا وكذا وهتجيب كذا وكذا وفي الاخر مفيش حاجة بتحصل من الكلام ده فا الطرف التاني بيكون مستني الحاجات دي تتعمل وهنا بتحصل مشاكل كتير فا النصيحة انك توعد بالحاجة اللي هتقدر تعملها وبس .
النصيحة رقم 7 : اهتم بمظهرك واهتمي بمظهرك .. والاهتمام هنا بيكون لنفسك الاول وبعد كدة للطرف التاني " خطيبتك او خطيبك " لان من المؤكد انك لما تظهر في اجمل صورة ده شئ هيفرح الطرف الاخر .
النصيحة رقم 8 : لازم تجيب هدية مفاجأة .. لازم تجيبي هدية مفاجأة
مش مهم تمن الهدية كام المهم انك تجيب هدية .. ممكن تكون حاجة بسيطة جدا بس هتفرح الطرف التاني جدا لانك كنت فاكره واشتريت هدية علشان تفرحه .
النصيحة رقم 9 : مش لازم تتكلم / تتكلمي في الموبايل كتير اوي او قليل اوي واختار الوقت المناسب للكلام
اتكلم في الموبايل بشكل متوسط لا كتير ولا قليل ولازم تعرف مواعيد الطرف التاني شغله وبينام امتي ومشغول في ايه ....الخ
يعني مثلا عارف ان الطرف التاني بينام الساعة 10 مساء وانت بترن عليه الساعة 11 مساء او مثلا بتتكلموا وجت الساعة 10 وانت مستمر ومش عايز تقفل معه مع انك عارف انه بينام الساعة 10 .
الكاتب : صابر عزيز
المقال يعبر عن رأي الكاتب ولايعبر بالضرورة عن رأي الموقع
