نصائح هامة لنسيان الحبيب
" خطوات و نصائح مهمة للخروج من صدمة الحب والانفصال "
" طريقة نسيان شخص تحبه "
" كيف انسى حبيبي "
" كيف تنسى من كنت تحب "
اولا نصائح مهمة لنسيان الحبيب
النصيحة رقم 1 : احسبها صح
فكر في الشخص اللي بتحبه هل هو متعذب زيك وبيفكر فيك وعايش في حزن ولا عايش حياته بشكل طبيعي لو فكرت كدة هتلاقي نفسك غلطان انك سايب نفسك في الحزن وفي الاكتئاب والطرف التاني عايش سعيد وفرحان . فا لازم تاخد خطوة وتخرج من الحزن ومتفكرش في الشخص ده .
النصيحة رقم 2 : شوف عيوب حبيبك اللي عايز تنساه
لما حد بيحب حد مش بيشوف عيوبه وبيشوف مميزاته بس
وفكرة انك تفكر في عيوبه خصوصا بعد الانفصال هتفيدك جدا انك تنساه .
النصيحة رقم 3 : قول لنفسك انك تستاهل حد احسن من الشخص ده
فكر في نفسك عملت ايه علشان الشخص ده لانك بتحبه بجد وحاولت تسعده وتفرحه واخترت تكمل حياتك معه بس هو مقدرش كل ده وقرر يستغني عنك .. دي حاجة متزعلش بالعكس تفرحك لانه فعلا ميستهلش حبك و انت تستاهل حد احسن من الشخص ده حد يقدر حبك ويحبك بجد وميقدرش يستغنى عنك .
النصيحة رقم 4 : اعرف ان الدنيا مش هتوقف ودي مش نهاية الطريق
في ناس لما حبيبهم بيسيبهم بيفتكروا ان الدنيا وقفت وده مش صحيح لازم تفكر ان الدنيا مش بتوقف على حد مش في انفصال الحب وبس ده كمان في الموت فكر كدة شوف كام حد حصل عنده حالة وفاة وساعتها شوفته حزين جدا ومش مصدق الصدمة وبعدها بشوية وقت نفس الشخص كمل حياته بشكل طبيعي .. او ممكن يكون الموضوع حصل معاك شخصيا ان حد قريب منك مات وساعتها افتكرت ان الدنيا وقفت بس بعد شوية لاقيت الدنيا مشيت وكملت حياتك بشكل طبيعي .. فا اتاكد ان الدنيا مش هتوقف علي حد بس في ايدك تختار تعيش وسط حزن او تعيش حياتك بشكل طبيعي .
النصيحة رقم 5 : اتاكد انك هتحب تاني
متفكرش ان الحب بيجي مرة واحدة والحب الاول وبس الحقيقة غير كدة زي ما حبيت الشخص ده هتقدر تحب تاني بس علشان تحب تاني لازم تتخلص من الحب الاول علشان تقدر تحب .
ثانياً خطوات نسيان شخص تحبه والخروج من صدمة الانفصال
الخطوة رقم 1 : امسح كل الذكريات اللي هتفكرك بالشخص ده
عشان تنسى الشخص اللي بتحبه لازم تمسح كل شيء ليه علاقة بيه وهيفكرك بحبك ليه.. امسح الرسايل والصور ووزع الهدايا او ارميها ومتخليش اي شيء يفكرك بالشخص ده .
الخطوة رقم 2 : اقطع كل وسائل الاتصال بالشخص ده
" احذفه من حياتك "
لو عايز تنسى بجد لازم تقطع كل وسائل الاتصال بالشخص ده امسح رقم تليفونه ولو عندك علي الفيس بوك او الايميل احذفه واعمله حظر وابعد عن اي شخص بينقلك اخباره ولو مش هينفع اطلب منه ميتكلمش عن الشخص ده قدامك تاني ومتحاولش تسأل عنه وتعرف اخباره عيش حياتك زي ما هو عايش حياته .
الخطوة رقم 3 : اشغل نفسك
اي حد بيحب حد بيهتم بيه فا من المؤكد ان الشخص اللي بتحبه كان واخد جزء كبير من وقتك وبعد ما انفصلتم اكيد الوقت ده مش بتشغله غير انك بتفكر فيه .. فا لازم تشغل وقتك ده بحاجة مفيدة .
" اخرج واتفسح - اسمع اغنية بتحبها - ساعد ناس جديدة ...الخ .
الخطوة رقم 4 : لازم شوية وقت
لو نفذت الخطوات اللي فاتت اتاكد انك هتنسى حبيبك بس هتحتاج شوية وقت و من خلال تجارب ناس قبل كدة المدة كانت من شهرين ل 3 شهور وفي خلال الفترة دي هتلاقي الشخص اللي بتحبه مش فارق معاك ومش بتفكر فيه زي الاول وهيكون بالنسبالك شخص عادي . بس اهم شيء انك تنفذ الخطوات اللي فاتت .
الخطوة رقم 5 : متقفلش علي نفسك
اخرج واتفسح واشتغل وافرح وعيش حياتك بشكل طبيعي واتعرف على ناس جديدة واكيد هتقابل شخص تاني يستاهل حبك .
الخطوة رقم 6 : قرب من ربنا
الخطوة دي اهم من كل الخطوات اللي فاتت وهي انك لازم تقرب من ربنا .. وصلي لربنا واطلب منه يساعدك في الخروج من القصة دي لان القرب من ربنا ده شيء جميل جدا وهتلاقي ربنا ساعدك انك تتخلص من حالة الحزن وطول ما انت قريب من ربنا هتلاقي نفسك فرحان وحياتك سعيدة وكل مشاكلك هتتحل .
الخلاصة : نسيان الحبيب شئ سهل جدا بس لو انت من جواك عايز تنسى .. وصعب جدا لو من جواك مش عايز تنسى .. خد القرار من جواك انك فعلا عايز تنسى الشخص ده ونفذ الخطوات اللي فاتت واكيد هتنسى الشخص ده .
ولو عندك اي نصيحة او تعليق ممكن تكتبه في صندوق التعليقات
الكاتب : القبطان
رابط الموضوع الاصلي علي موقع القبطان من هنا
المقال يعبر عن رأي الكاتب ولايعبر بالضرورة عن رأي الموقع
