" الحياة في أوروبا " - " السفر الى اوروبا " - " الهجرة الى اوروبا "
تاني حاجة ان في فرق كبير بين انك مسافر Euro Trip كام يوم و راجع و فرق بين انك مقيم.
- الحصول على اقامة في اوروبا :
الاقامة في اي بلد لازم يكون في سبب لاقامتك في البلد دي و لو السبب مقنع و امكانياتك بتثبت انك قادر على المعيشة هتاخد الاقامة. كل دولة و ليها قوانين خاصة زي ان في اسبانيا لو اتجوزت سنة واحدة هناك بتاخد الباسبور و ان في المانيا في الدراسة لازم حساب مغلق ب8000 يورو او برنامج ريادة الاعمال في المجر الي بيسمحلك باقامة اوروبية في حال استثمارك كان 10,000 يورو.
لكن الاساس في كل الدول ان سفرك لازم يكون ضمن 4 حجات :
1-دراسة
2-زواج
3-عمل
4-استثمار
مفيش طريقة خامسة للحصول على اقامة (شرعية) لان اللجوء كلة مرفوض دلوقت.
- الحياة الاجتماعية:
الموضوع قريب من بعضة في اغلب الدول الاوروبية الي بيكون فيها طابع الفردية Individualism بمعنى ان كل فرد لة حياة خاصة بعيدة عن الباقي و بيشتغل طول الاسبوع و بيكون كل الخروجات او المقابلات في نهاية الاسبوع. في الغالب بتكون Bar للشباب اولقاء في شقة اي حد من الاصدقاء او في مطعم.
الطابع الغالب في الاوروبيين مفيش حاجة اسمها انت مبتسألش لية ولا انا زعلان...لو زعلان اولع :D
في دول زي شرق اوروبا مش من السهل انك تختلط بيهم...و اغلب علاقاتك هتكون صباح الخير صباح النور.
من الاخر متتوقعش انك هتروح اوروبا هتلاقي الناس مستنياك في المطار بالاحضان...هتعيش لوحدك كتير.
- الحياة العملية :
عشان تلاقي شغل في بلد قدامك حلين الاول انك تكون عارف لغة البلد لدرجة يعتمد عليك في الشغل باللغة دي و الحل التاني انك تلجأ للشغل في Corporate world عشان كلة هيكون بالانجليزي و مش محتاج انبة على اهمية الانجليزي في كل الاحوال. في حل اخير و هو العمل الحر ممكن نتكلم عنة في بوست تاني عشان مواضيعة طويلة.
فكرة انك رايح اوروبا تكون نفسك دي خلصت من ايام همام في امستردام. :D يعني مفيش حد بيشتري شقق في اوروبا ولا حتى الاوروبيين (لكل قاعدة استثناء طبعا) لكن نتكلم على الحالة العامة.
الكويس في الشغل الاوروبي انة لو شرعي يبقى هيكون كافي انك تعيش كويس لكن لازم تتوقع انك تشوف شغل تاني جمب الاول. كمان بالنسبة للطلبة مفيش حد في اوروبا بيدرس و بس...لازم تكون بتدرس و بتعمل حاجة. المرتبات مش سهل تحوش منها لكن لكل مجتهد نصيب بالذات لو بتدور على طرق جديدة للشغل مش مهروسة عند كل الناس. ساعتها بس ممكن تحوش :D
في بعض المدن فيها شغل بالعربي زي Wroclaw في بولندا فاتح فيها مكتب للطيران القطري و لشبونة فاتح خدمة عملاء لشركة عربي لكن منصحش حد يعتمد عليهم في حاجة او يحط امل عليهم كبير.
- التعليم :
التعليم اغلبة قائم على البحث بمعنى مفيش ورقة هتقراها هتدخل الامتحان تحطها. كمان لازم تعرف ان اغلب الشباب الاوروبي معاهم ماسترز و كتير جدا منهم برضة مش لاقي شغل مناسب لية. يعني لو لقيت اي شغل امسك فية و ربنا يكرم.
في جامعات مجانية و دي بتكون في الغالب بلغة البلد و في جامعات بالقسط الشهري ممكن 200-300 يورو في الشهر و في جامعات بالسمستر. موضوع المنح دة relative و تفاصيلة كتير و ممكن نتكلم عليها في بوست تاني.
الحياة في اوروبا اغلبها طابع التكرار و الروتين. مفيش حد بيخرج يتفسح كل يوم ولا بيسافر كل يوم بلد الا لو كان اهلة بتدفعلة او هو قدر يكون نفسة بطريقة غير تقليدية.
التكرار في الاكل و المشاوير و الشغل الخ رغم اني منصحش بية لان الافضل انك تفضل مركز ازاي تحسن مستواك و ازاي تغامر اكتر عشان توصل لحاجة افضل.
اهم حاجة عايز اأكد عليها ان العالم مش اوروبا و ان اوروبا مش هي المكان الي تحقق فيها احلام الثراء الفاحش و انك فرصتك في افريقيا او اسيا او الهند او امريكا الجنوبة ممكن تكون افضل 100 مرة من اوروبا على حسب شخصيتك و طموحك و امكانياتك و ان الباسبور مش هيضمنلك مستقبل. في عرب قد كدة معاهم باسبورات اوروبية و عايشين على دعم الدولة.
بوست : Ahmed Abdelaziz
