مهم للمفلسين : ازاي تكسب فلوس كتير وتعمل مصدرين دخل في نفس الوقت
ازاي تعمل دخلين للفلوس في نفس الوقت؟
الحجات المهمة انك تعملها كشاب لسة متخرج من جامعة انك تبذل مجهود في ان يكون عندك مصدرين دخلين مختلفين.
اول رد بسمعة لما بقول كدة لحد "يا عم هو انا عارف اعمل مصدر دخل واحد عشان اعمل اتنين!!!
مبدأيا انت بتدور على مصدر دخل واحد يكون كافي لاحتياجاتك المادية و غالبا بتكون رابطة بمؤهلك الدراسي. يعني لو في تجارة هتحاول تكون محاسب و خلاص لو هندسة تشتغل Full time هندسة و خلاص.
لكن الموضوع دة على المدى البعيد مش كويس ليك. اولا لأن في سوق العمل دلوقت مفيش مبدأ الوظائف الثابتة و الترقية بالاقدمية و خلاص (على الاقل في القطاع الخاص)
يعني مفيش ضمان لاي تطور مع مرور الوقت لو مفيش مجهود.
الحل فين عشان تقدر تعمل مصدرين دخل؟
و انت بتدور على شغلك الاساسي لازم تتأكد ان الشركة الي هتشتغل فيها مش هتستغلك و تشغلك 12 ساعة بسعر 8 سعات.
دة هيفرق معاك في كل شيئ لانك لو في نوعية الشغل الي يضيعلك يومك كلة مفيش فرصة انك تركز في دخلك التاني. يفضل ان شغلك الاساسي تقدر تحوش منة مبلغ و لو صغير على اساس انك تعود نفسك على الاقتصاد المادي.
نتكلم على الدخل التاني:
دي لها علاقة بالمهارات بتاعتك. يعني بتعرف انجليزي تحاول تشتغل في مجال محتاج لغة. لو شكلك كويس و شيك شوف مجال زي الUshering او PR بدوام جزئي لبعض الشركات الصغيرة. لو صوتك كويس ابتدي سجل لنفسك Portfolio و وزعة على الشركات الصغيرة و المتوسطة كواحد Voice over. بتحب مثلا الدراسة تشتغل في مساعدة الطلبة في دراستهم بمبلغ اقل مثلا من المدرسين او المعيدين.
لو بتحب فيسبوك ابتدي اتعلم علم السوشيال ميديا و التسويق عن طريق السوشيال ميديا الخ... و اشتغل مع بعض الصفحات او ابدأ صفحة ليك و اتعلم بيها.
لما تعمل دة هيكون قدامك اكتر من طريق.
-شغلك الاساسي يكبر و مع الوقت يبقى شغلك التاني دة هواية بتحوش منها فلوس للسفر او الفسح.
-مع الوقت يحصل مشاكل في شغلك الاول تبقى عايز تشوف بديل...ساعتها ممكن تقدم على شغل تاني لكن و انت معاك اكتر من خبرة.
-شغلك التاني يكبر مع الوقت و يكون شغلك الاساسي و ممكن يتحول لبيزنس كمان.
-شغلك التاني مع شغلك الاول مع الوقت الاتنين يكبرو ساعتها دخلك مش بيزيد بهامش بسيط..دة بيتضاعف.
-يحصل مشاكل في اي دخل من الدخلين و ساعتها هيكون عندك سند تاني بدل ما تتسوح .
-حتى لو حصل مشاكل في الدخلين في نفس الوقت هيكون عندك سند مادي انت محوشة.
بوست : Ahmed Abdelaziz
