جالي عيان عامل تركيبه في سنانه ومش مظبوطه وشكلها وحش وبارزه لقدام وعملاله ضب وعاوز يغيرها ... فكيتهاله لقيت الاسنان اللي تحتيها لازم تتظبط عشان ماينفعش ناخد مقاس ع الوضع ده
وبالفعل اديته بنج وبدأت اظبطه .
بس كان كل شويه يرفع ايده فأوقف شغل ويسألني احنا بنعمل ايه ؟
فأبتدي افهمه واشرحله ...وارجع اكمل شغل ...فيوقفني تاني ويسألني ..هو انت خلصت ولا لسه ؟ فقوله بأبتسامه ظريفه انا لو خلصت هتعرف .. انا مش بذاكر تضاريس بقك يعني
وارجع اشتغل تاني ... بعد دقيقتين قام موقفني ...وقالي لو سمحت ممكن مرايه ؟ فبقوله ليه ؟ قالي هشوف حاجه
قمت قالع الجوانتي ..ورحت جبتله مرايه ... ففضل باصص فيها دقيقه وقام قايلي تمام انا شايف كده كويس ...ياريت " ماتخفش " منهم تاني بقي ويلا خد المقاس
طبعا كلمه ماتخفش منهم دي كسرتني وهزتني ...بس ساعتها جه في بالي حاجه من اتنين
يا اما هو دكتور اسنان اكبر مني وخبره عني ...وشايف ان كفايه لحد كده ... وبيعدل عليا وكان عامل موضوع تغير التركيبه ده اختبار ليا وحد زقه عليا من الماجستير
او هو كان جاي يخف سوالفه ويعمل حلقه حسن الشافعي ...وانا نسيت واشتغلتله في سنانه ...
فسألته بكل تلقائيه هو حضرتك دكتور اسنان ؟...فقالي لا ...قولتله طب عندك معمل اسنان ؟ قالي لا ...قولتله يبقي اكيد مهندس معماري ؟ قالي لا ... بس انا بفهم في كذا مجال يعني منهم الاسنان
بنفس الابتسامه الظريفه قمت لازقله التركيبه القديمه ... ورجعتله فلوسه كلها وقولتله كل شئ قسمه ونصيب واحنا مش لبعض
ياريت يا جماعه زي مانتوا بتكرهوا دكتور الاسنان تتأكدوا كمان انه بيكرهكم بنفس القدر او يزيد قليلا ...فياريت نحاول نعدي النص ساعه اللي بنقعدها مع بعض دي علي خير ومش لازم نتعب بعض ...عشان زي مانتوا عارفين دكاتره الاسنان في سويسرا وامريكا والعالم رقم واحد في الانتحار ...فمبالك بدكتور اسنان وفي مصر وبيتعامل مع مصريين ؟
الكاتب : محمد جمال
المقال يعبر عن رأي الكاتب ولايعبر بالضرورة عن رأي الموقع
شاهد ايضا : وصفة طبيعية للتخلص من التسوس وآلم الأسنان نهائياً
