1- البزنس لعبة ليها قواعد و علم و سياسة نفس طويل ، مش معني انك شاطر في شغلك أو موهوب أو معاك فلوس عايز تستثمرها ، تروح تعمل بزنس ده غلط ، لازم تعرف قدراتك الأول و تدرس بيزنس و يبقي عندك خطة واضحة و تطبق باحتراف.
2- دراسة الجدوي مهمة جدا قبل ما تبدأ تعمل أي مشروع لانها بتقولك مشروعك ينفع أو مينفعش أو محتاج تعدل رؤيتك .
3- أوعي تستثمر كل فلوسك في مشروع ، و أبعد عن التمويل الخارجي في البداية ، التمويل حلو في التوسع مش الإنشاء.
4- المشاريع اللي فيها شركاء اقوي و أكثر فاعلية ، لكن لازم تتأكد انهم محترفين و متخصصين في المجال غير كده هتلبس في الحيطة و هتخسر كتير اوي .
5- قوة أي بيزنس في قوة فريق العمل مش في قوتك انت الشخصية ، لو فريق عملك ضعيف و انت عبقري هياخدك و ينزل الأرض و العكس صحيح علي فكرة .
6 - البزنس مش مكسب و خسارة ، البزنس إدارة ممكن تكسب و تخسر كتير و ممكن تخسر و تحول خسارتك لمكسب ، إدارة المكاسب و الخسائر هي اللي بتفرق .
7- اتعلم ازاي تخسر قبل ما تتعلم ازاي تكسب ، لأن المكسب مش هيسبب لك مشكلة لكن الخسارة هتبقي مشكلة بالنسبة ليك لو متعرفش ازاي تتعامل معاها و تكسب منها .
8- البزنس اتجاه مش تجربة أو وظيفة مؤقتة ، ده قرار و بتتحمل مسؤليته ممكن تخسر كتير في البداية بس هتكسب في النهاية أو تستسلم .
9- التعليم الكويس هيكلفك كتير ، لكن لو متعلمتش ده هيكلفك اكتر
10- اتعلم فن المخاطرة لازم تخاطر ، لو بتحب الأمان أبعد عن البيزنس
11- أوعي تعتمد علي مصدر دخل واحد أو بزنس في نشاط واحد ، لازم تستثمر و تخلق مصادر دخل كتير .
شاهد ايضا : ازاي تكسب فلوس كتير وتعمل مصدرين دخل في نفس الوقت
12- مش مهم هتدفع كام أو ده هيكلفك كام ، المهم ده هيكسبك كام بعدين ، أوعي تبص تحت رجلك .
13- امشي عكس الناس ، دوس في الأماكن اللي محدش فكر يروح لها ، أوعي تلعب في المضمون دي خسارة أو هتفضل مكانك .
14- بلاش تعتمد علي التوقعات أو الأمل و التحفيز ، الكلام ده جميل بس الواقع مختلف كتير، اسمع للمستشارين و المختصين .
15- أخسر لما الكل يكسب ، علشان تكسب وقت ما الكل بيخسر .
16- أوعي تسأل الناس عايزة اية ؟ لأنهم هما نفسهم ما يعرفوش .
الكاتب : شريف سعيد
