- في حضانة بنتي والد طفلة من الأطفال شخصية عجيبة جدا، اول مرة شفته فيها كنا بندفع مصاريف الحضانة ، شاب تلاتيني ماسك 3 موبايل اي فون 7 معرفش ايه الفكرة بس ماشي وعلبتين سجاير مارلبورو ومولع سيجارة وماسك في ايده سيجارة.
،،
- المديرة بتقوله المصاريف كذا يقولها لالالالالالالالالا انا ميهمنيش اي فلوس يعني ادفع قد كده عشر مرات، قالتله طيب اتفضل املي ألأبلكيشن يقولها هاتي الفارغ وانا املهولك ولا علي ايه قوليلي بيتباع فين وانا اشتريلك عشرة ، المديرة بهدوء : يافندم الأبلكيشن ده ورقة بنكتب فيها بيانات حضرتك والطفل.
،،
- الجاهل : اه مانا عارف انتي فاكراني جاهل ولا ايه دنا تجارة انجلش ،، المديرة : طيب اتفضل املي الورقة ،، الجاهل : لا معلش انا اصلي ماليش في الكتابة لا مؤاخذة امليها انتي وضيفي الحساب عالمصاريف
- المديرة: ...................................................
]ده كان اول موقف
،،
الموقف التاني
المديرة : حضرتك البنت غابت امبارح ليه اتمني تكون بخير
الجاهل : اصلها لامؤاخذة طلبت مني مانجا خدت عربيتي السراتو وقعدت الف بيها لحد الفجر لحد ما لقينا مانجا
المديرة : حضرتك احنا في الشتا وكان ممكن تقولها ما ينفعش دلوقتي مانجا وخلاص
الجاهل : لا عدم المؤاخذة بنت الكلب دي انا مربيها عالغالي وكل طلباتها اوامر حتي لو طلبت لبن العصفور
،،
الموقف التالت
اجتماع اولياء الأمور ،، الجاهل دخل لقي الأمهات قاعدين فقالنا طب طالما انتو نسوان في بعض طالبيني ليه ،، واخيرا النهاردة ،، الحضانةمنظمة حفلةبسيطة للاطفال بمناسبة عيد الأم ،، وحقيقي عاملين مجهود خرافي انهم يدربو اطفال 3 و 4 سنين علي غنوة ورقصة وعاملين زينة ومسرح اطفال وحاجات تفرح.
،،
- الأخ الجاهل وقف قدام المسرح بالظبط بيصور بنته بالموبايلين ال اي فون ومش مهم بقي باقي الأهالي يشوفو ولادهم ولا مهم ان الأطفال اتسرعو من سجايره والطافية اللي بتطير عليهم ،، ليه وليه مدرسة قالتله من فضلك اقعد استريح وفي مصور بيصور وهنبعتلك كل الصور والفيدوهات فجأة لقينا صوت عربجي.
،،
- عليا الطلاق اشتريكو واشتري الحضانة دنا دافع فلوس عشان مزاجي عشانافرح ببنتي انا هدخلها مدرسة جيمس (يقصد شيدس) ب 50 الف جنيه يا فقرا دنا صارف ومكلف دنا جبتلها الفستان من عند مصمم ازياء مش لبس زي عيالكم ( الفستان بالظبط جيبونة منفوشة وطرحةستارة )
،،
- انا صعبان عليا البنت اللي هتتربي مع اب زي ده، وصعبان عليا ان الفلوس هي اللي بتحدد مين يدخل مدرسة ايه
وان كنت اعتقد ان المدراس المحترمة بتعمل انترفيو محترم للاباء ، مش عنصرية والله بس بحلم ان الأدب والأخلاق يسبقو العلم وياخدو مكانهم في المجتمع عشان الراجل ده واللي زيه ميتحكموش في حياتنا انا كارهة ان بنتي وكل الأطفال سمعو الفاظ زبالة جدا وسمعو يمينات طلاق يكفي ان بيقول لمراته وبنته يلا ينعل ابوكو ولاد كلب .
،،
- يعني ايه كده وليه مافيش طريقة مناسبة للتصرف مع الناس دول غير ان حد قليل الأدب اكتر منه ويقعدو يعلو علي بعض في السفالة
